२०७७ फागुन १३, बिहिबार | Thu, 25, Feb, 2021

दाप्चा क्षेत्रको एकमात्र कृष्ण बहुमुखी क्याम्पसको दशौं बार्षिकोत्सव

  • २०७७ माघ २९, बिहिबार मा प्रकाशित १ हप्ता अघि
  • १२४ पाठक संख्या
  • नमोबुद्ध–९ छत्रेबाँझमा रहेको कृष्ण बहुमुखी क्याम्पस दाप्चाको दशौं बार्षिकोत्सव सम्पन्न भएको छ । क्याम्पस व्यवस्थापन समिति अध्यक्ष एवं नमोबुद्ध १० का वडाअध्यक्ष रामकृष्ण अधिकारीको अध्यक्षता तथा नमोबुद्ध नगरपालिका प्रमुख टिपी शर्मा तिमल्सिनाको प्रमुख आतिथ्यतामा सम्पन्न भएको हो ।

    कार्यक्रममा नगर प्रमुख तिमल्सिनाले नगरमा शैक्षिक क्षेत्रको विकासका लागि आफूहरु निर्वाचित भएदेखि नै आवश्यक नीति तथा कार्यक्रम तयार पारी कार्यान्वयनमा लगिएको बताए । दाप्चा क्षेत्रको एकमात्र क्याम्पस दाप्चा कृष्ण बहुमुखी क्याम्पसको विकासका लागि नगरपालिकाले आवश्यक सहयोग र समन्वय गर्ने तिमल्सिनाले बताए । नमोबुद्ध नगरपालिकाका उपप्रमुख रामदेवी तामाङले शिक्षाको विकासबाट नै मुलुकको विकास हुनुपर्ने भन्दै दाप्चा कृष्ण बहुमुखी क्याम्पसले दाप्चा क्षेत्रको शैक्षिक विकासमा खेलेको भूमिकाको प्रशंसा गरिन् । नमोबुद्ध नगरपालिकाका प्रमुख प्रशासकीय अधिकृत राजन पौडेलले गुणस्तरीय शिक्षाले नै मुलुकको संर्वाङ्गिण विकास हुने बताए । कार्यक्रममा दाप्चा माविका प्रधानाध्यापक दिनेश अधिकारी, शिक्षक महासंघ नमोबुद्धका अध्यक्ष पञ्चसिं लामा, समाजसेवी एवं क्याम्पस व्यवस्थापन समितिका पूर्वअध्यक्ष कृष्णवहादुर श्रेष्ठ, सहयोगदाता सूर्यकुमार श्रेष्ठ, युवा व्यवसायी एवं क्याम्पसका सहयोगी धावा लामा, नायिका केकी अधिकारी, कार्यक्रममा क्याम्पस व्यवस्थापन समिति उपाध्यक्ष नवराज अधिकारीले लगायतले मन्तव्य राखेका थिए ।

    कार्यक्रममा क्याम्पस प्रमुख ज्ञानवहादुर भुजेलले क्यापस स्थापनादेखि अहिलेसम्मको अवस्थाबारे जानकारी गराएका थिए । क्याम्पसबाट हालसम्म ४० भन्दा बढी विद्यार्थीले स्नातक तह उत्तीर्ण गरिसकेका छन् । २०६७ सालमा स्थापना भएको क्याम्पसमा हाल व्यवस्थापन संकायमा बिबिएस र शिक्षाशास्त्र संकायमा बिएडतर्फको पढाई हुने गरेको छ । स्थानीय शिक्षाप्रेमीहरुको सक्रियतामा देउसीभैलो खेलेर आर्थिक सहयोग संकलन गरी क्याम्पस स्थापना गरिएको थियो । क्याम्पस स्थापनाका लागि १३ सय भन्दा बढीले आर्थिक सहयोग गरेका थिए । क्याम्पसमा हालै विश्वविद्यालय अनुदान आयोग र सामाजिक विकास मन्त्रालयको सहयोगमा भवन निर्माण भएको छ । अझै पनि क्याम्पसमा तुलनात्मकरुपमा विद्यार्थी संख्या कम भएको, आर्थिक रुपमा सबल हुन नसकेको, पुस्तकालय, खेल मैदान आदि व्यवस्थापन गर्न समस्या परेको एक घर एक स्नातक अभियान अघि बढाउन नसकिएको, छात्राहरुलाई पुरै अवधी क्याम्पसमा टिकाउन समस्या परेको भुजेलले जानकारी दिए ।

    प्रतिक्रिया दिनुहोस