तेल बोक्ने ट्यांकर त्रिशूलीमा खस्यो, ट्यांकरमा आगलागी, चालक र सहचालक सम्पर्कमा आए

मिडियाचोक

२०७७ आश्विन ४, आईतबार मा प्रकाशित ३ साल अघि

२९० पाठक संख्या

शनिबार मध्यराति पृथ्वी राजमार्गस्थित धादिङ गल्छी गाउँपालिका–६ सत्केरी ढुङ्गामा काठमाडौं जाँदै गरेको डिजेल ट्यांकर सडकबाट करिब १०० मिटर तल त्रिशूली नदीमा खसेको छ ।

नारायणगढबाट काठमाडौं जाँदै गरेको ना ४ख २८२२ नम्बरको डिजेल ट्यांकर खसेपछि तेल भर्ने भागमा आगलागी समेत भएको थियो । पानीमा माथिल्लो भाग मात्रै देखिएको उक्त ट्यांकरमा आगलागी भएको गजुरीस्थित इलाका प्रहरी कार्यालयका प्रहरी नायब उपरीक्षक विश्वराज खड्काले जानकारी दिए ।

यसैबीच ट्यांकरका चालक मकवानपुरको हेटौंडा उपमहानगरपालिका–११ का ३२ वर्षीय सुजित बोहोरा र सहचालक सकुशल रहेको र सम्पर्कमा आएको प्रहरीले जनाएको छ ।